10:52 - 20.11.2025
20 noyabr, Fineko/abc.az. Asiya İnkişaf Bankı (ADB) "Universal səhiyyə əhatəsinin (UHC) UHC PEERS bilik və resurs mübadiləsi şəbəkəsi vasitəsilə sürətləndirilməsi və dəstəklənməsi" adlı regional layihəyə texniki yardımın göstərilməsi imkanlarını nəzərdən keçirir.
ABC.AZ xəbər verir ki, bu barədə Asiya İnkişaf Bankından bildirilib. Layihə Azərbaycan da daxil olmaqla 43 ölkəni əhatə edir. 495 min ABŞ dolları məbləğində vəsaitin Xüsusi Texniki Yardım Fondu vasitəsilə ayrılması planlaşdırılır.
Layihə region ölkələrinin universal səhiyyə əhatəsinə doğru irəliləmək səylərinin dəstəklənməsinə yönəlib. Təşəbbüs çərçivəsində ADB dövlət siyasəti sahəsindəki mütəxəssislərdən və praktiklərdən ibarət şəbəkə yaradacaq. Bu şəbəkə səhiyyə sahəsində təcrübə mübadiləsi və həll yollarının birgə hazırlanması ilə məşğul olacaq.
Texniki yardım aşağıdakı iş istiqamətlərini nəzərdə tutur: region ölkələrində və onun xaricində UHC-nin tətbiqi üzrə qabaqcıl təcrübə və bilik bazasının formalaşdırılması; səhiyyə üçün gender yönümlü rəqəmsal alətlər də daxil olmaqla həll yollarının hazırlanması; ölkələr arasında bərabər şərtlərlə təcrübə mübadiləsinə dəstək; özəl sektorun iştirakı da daxil olmaqla şəbəkələr və peşəkar alyanslar vasitəsilə potensialın birgə artırılması; bilik mübadiləsi üçün onlayn platformaların yaradılması.
Universal səhiyyə əhatəsinin BMT-nin Dayanıqlı İnkişaf Məqsədlərinə daxil edilməsinə baxmayaraq, Asiya və Sakit Okean regionunun bir çox dövlətləri hələ də UHC-yə nail olmaqda geridədir. Regionda əhatə indeksi 2000-2021-ci illərdə 45 bənddən 68 bəndə qədər artsa da, irəliləyiş nəzərəçarpacaq dərəcədə yavaşlayıb: 2015-ci ildən 2021-ci ilədək cəmi 3 bənd artım olub, 2019-cu ildən sonra isə artım dayanıb.
